I kishte rrobat tepër të bardha e flokët tepër të zeza…!
(Dersi i xhumasë)
Nuk e zbuluan hoxhallarët, e as dijetarët apo sahabët (shokët e Pejgamberit a.s.), por besimin islam e përcaktoi Allahu në Kur’an dhe e qartësoi Pejgamberi a.s. në hadithet e tij.
1.
Omeri ibn Hattab, e tregon një ngjarje, hadithi i Xhibrilit, e thotë (parafrazim):
“Me një rast kemi qenë ulur me Pejgamberin a.s., kur papritmas, u shfaq një person me rroba tepër të bardha e me flokë tepër të zeza. Askush nuk e njihte edhe plus asaj nuk kishte ndonjë gjurmë të udhëtimit, që tregon se ka qenë udhëtar rasti.
Erdhi dhe u ul shumë afër Pejgamberit të Zotit, gjersa i mbështeti gjunjët e tij me gjunjët e Pejgamberit a.s. dhe i vendosi duart mbi kofshët e veta.
Edhe filloi me ia ba disa pyetje Pejgamberit a.s., si:
Çka është Islami; çka është imani, çka është Ihsani, pastaj kur do të ndodhë Kijameti, etj. Dhe për të gjitha këto, Pejgamberi a.s. përgjigjej, kurse ai ia aprovonte.
Kur i mbaroi pyetjet, personi në fjalë u çu dhe shkoi. Pejgamberi a.s. tha: O Omer, a e kuptove se kush ishte? Omeri tha: Jo.
Pejgamberi a.s. tha: “Ai ishte meleku Xhibril, erdhi për t’ju mësuar çështjet e fesë tuaj.”
2.
Ky hadith, përtej kornizimit të besimit islam, i jep edhe dy mësime:
– E para, ka të bëjë me ihsanin – përjetimin e fesë. Asnjë punë nuk ka vlerë, nëse nuk përjetohet.
Fundja, edhe ushqimin që e hamë, po e hëngrëm pa shije e pa lezet, nuk e shuan dot urinë.
Ibadeti apo vepra që përjetohet lë gjurmë dhe e përmirëson shpirtin e njeriut.
Çdo gjë që bëjmë, duhet ta bëjmë për hir të Zotit, sepse vetëm atëherë e përjetojmë me shpirt.
Për shembull, nëna apo prindërit sakrifikojnë prej kafshatës së gojës për fëmijtë e vet, por asnjëherë nuk e përjetojnë si sadakë, e Pejgamberi a.s. ka thënë se “sadaka më e vlefshme e njeriut është ajo për familjen”.
Prandaj, kur u pyet Pejgamberi a.s. për përjetimin e fesë (ihsanin) tha: “Ta adhurosh Allahun sikurse je duke e parë, edhe pse nuk e sheh Atë, Ai të sheh ty.”
– E dyta, tregon se melekët mund të personifikohen në formë të njeriut dhe kjo është përmendur dhe në Kur’an…!
Orhan Bislimaj
Xhamia “Osmani r.a.”, Prizren
23 shkurt 2024